Rah Pur Khar Hai Kya Hona Hai
Ahmad Raza Khan (Ala Hazrat) (d. 1921) · Urdu
راہ پر خار ہے کیا ہونا ہے
The path is full of thorns – what will become of me? A naat of hope in the Prophet’s ﷺ mercy.
راہ پر خار ہے کیا ہونا ہے
پاؤں افگار ہے کیا ہونا ہے
کام زنداں کے کیے اور ہمیں
شوق گلزار ہے کیا ہونا ہے
جان ہلکان ہوئی جاتی ہے
بار سا بار ہے کیا ہونا ہے
پار جانا ہے نہیں ملتی ناؤ
زور پر دھار ہے کیا ہونا ہے
روشنی کی ہمیں عادت اور گھر
تیرہ و تار ہے کیا ہونا ہے
بیچ میں آگ کا دریا حائل
قصد اس پار ہے کیا ہونا ہے
ساتھ والوں نے یہیں چھوڑ دیا
بے کسی یار ہے کیا ہونا ہے
آخری دید ہے آؤ مل لیں
رنج بے کار ہے کیا ہونا ہے
دل ہمیں تم سے لگانا ہی نہ تھا
اب سفر بار ہے کیا ہونا ہے
کیوں رضاؔ کڑھتے ہو ہنستے اٹھو
جب وہ غفار ہے کیا ہونا ہے
Source: Wikisource – Hadaiq-e-Bakhshish. Public domain (poet d. 1921; Hadaiq-e-Bakhshish published 1907–1926).